Kulturdirektoratet innfører ny søknadsportal

Dei siste åra har Kulturdirektoratet arbeidd kontinuerleg med forbetring av interne system og prosessar. Ein del av dette arbeidet blir ny søknadsportal, som skal svare på behova til brukarane og gjere løysinga meir sjølvbetjent. Søknadsportalen skal innførast trinnvis, og i første omgang skal to av Kulturrådets tilskotsordningar brukast som pilot, for å hente inn erfaringar både frå brukarperspektiv og frå systemet. Ordningane som er med i piloten er andre musikktiltak og komposisjon og produksjon av musikk. Søknadsvindauget vil vere ope frå 7. mai til søknadsfristen 4. juni kl 13.00. 

– Kulturdirektoratet innførte først digitale søknader i 2013. Sidan den gong har det skjedd mange teknologiske endringar, og det er på tide å oppgradere systemet. Målet er å gjere det enklare for søkjarane, seier direktør Kristin Danielsen.  

Det nye for søkjarane er først og fremst brukargrensesnittet. Den nye søknadsportalen bruker ID-porten for innlogging, dermed vil søkjarar ikkje lenger nytte Altinn. Elles er det fleire forbetringar, som til dømes at du kan gjere endringar i søknaden etter at han er sendt inn, fram til utløpet av søknadsfristen.  Hovudsakleg er spørsmåla i søknadsskjemaet dei same som før. Det er ingen endringar i korleis søknader blir behandla av Kulturrådet.   

– Kulturrådet ønskjer ny søknadsportal velkomen. Som leiar av musikkutvalet for komposisjon, produksjon og andre musikktiltak ser eg fram til å sjå kva det nye systemet kan gjere for søkjarane og for oss som fagutval, seier Nasra Ali Omar, leiar i musikkutvalet for komposisjon, produksjon og andre musikktiltak og medlem i Kulturrådet. 

Vidare utrullinga av søknadsportalen vil gå føre seg frå hausten 2024. Kulturdirektoratet vil informere i god tid om dette på nettsidene våre. Inntil alle ordningar er overførte til nytt system, vil vi operere med den nye søknadsportalen og Altinn parallelt. 

Tilskotsordningar

Andre musikktiltak

Komposisjon og produksjon av musikk