Årsrapport Kulturrådet 2016

Ei oppsummering av Kulturdirektoratet i tekst og tal for 2016. I årsrapporten finn du oversikter i tal og tekst over alle tildelingane som vart gjort og ei skildring av Kulturdirektoratets aktivitetar gjennom året.

Det kom inn 20 483 søknader til alle ordningane i Kulturdirektoratet i 2016. Dette er ein auke på 116 frå 2015. Også i 2016 enda omlag 25 prosent av søknadane med tilskot. Det vil seie at 4953 prosjekt, kunstnarar, festivalar og kulturverksemder fekk prosjektstøtte eller stipend i året som gjekk. I tillegg blei det kjøpt inn meir enn 1000 bøker som blei fordelte til folkebiblioteka.

Kulturdirektoratet forvalta til saman over 1,4 milliardar kroner i 2016. Desse vart fordelt på:

• Norsk kulturfond, 876 mill. kr
• Statens kunstnarstipend, 319 mill. kr
• Fond for lyd og bilete, 37 mill. kr
• Museumsutvikling, 26 mill. kr
• Andre oppgåver, inkl. Statens utstillingsstipend 6 mill. kr
• Driftsutgifter 151 mill. kr

Støtte til kvar tredje søkjar frå Kulturfondet

Den største pengesekken Kulturdirektoratet forvaltar er Norsk kulturfond. Fondet var på 876 millionar kroner i 2016. Det kom inn 8434 søknader om støtte frå Kulturrådet. Dette var ein nedgang på 640 i høve til 2015. Ei årsak til dette kan vere omlegging frå fire til to søknadsfristar i året på nokre av støtteordningane. På musikkområdet var det ein nedgang på cirka seks prosent. Også på scenekunstområdet var det ein liten nedgang i talet på søknader. 

37 prosent av søknadene til Kulturfondet enda med tildeling. Dette er ein auke på to prosent i høve til 2015 og betyr at 3 248 prosjekt og bøker vart støtta og kjøpt inn. Dersom vi deler landet opp i landsdelar ser fordelinga av midlar slik ut:

Kunstnarstipend

Statens kunstnarstipend er den nest største pengesekken i Kulturdirektoratet og blir forvalta av Utvalet for Statens kunstnarstipend og garantiinntekter. Kunstnarstipenda skal leggje til rette for at enkeltkunstnarar skal kunne bidra til eit mangfaldig og nyskapande kunstliv. I 2016 kom det inn nesten 8 400 søknader om stipend. 901 av desse enda opp med å få stipend.

Stipenda blei fordelte slik mellom landsdelane:

Du kan lese meir om fordeling av midlar i 2016 og Kulturrådet sine aktivitetar i årsmeldinga.

Modernisering av søknadshandsaminga

Modernisering og omorganisering har vore to viktige stikkord for Kulturdirektoratet dei siste fire åra.  I 2016 vart den elektroniske søknadsportalen vidareutvikla og Altinn-portalen blei nytta til nye søknadsskjema. Dette medførte at alle søkjarane måtte logge seg inn med elektronisk ID via ID-porten. Dette gir betre skjema og rettleiingstekstar til søkjarane. Det gir i tillegg kortare sakshandsamingstid og raskare tilbakemelding til søkjarane om at søknaden er motteken.

Andre oppgåver i 2016

Kulturdirektoratet utfører også ei rekkje andre oppgåver. Fond for lyd og bilete fekk inn i overkant av 3000 søknader og delte ut 38,4 millionar kroner til 583 prosjekt i 2016.

På museumsfeltet har Kulturdirektoratet oppgåver knytte til utvikling, forvalting og rådgjeving. Ein viktig del er forvalting knytt til mål- og resultatstyring i sektoren. I tillegg fordeler Kulturdirektoratet spelemidlar til utvikling i museumssektoren. I 2016  vart det fordelt 23,6 millionar kroner til  58 prosjekt. Det kom inn 110 søknader.

Tabell 1: Tal på tildelingar - Norsk kulturfond - 2016

Landsdel	Søknader	Tildelingar	Prosent
Sørlandet	209	84	40%
Østlandet	4528	1630	36%
Vestlandet	1300	467	36%
Trøndelag	555	197	35%
Nord-Norge	547	219	40%
Utlandet	117	28	24%
Totalt	7256	2625	36%

 

Tabell 2: Søknadssum og tildelt sum - Norsk kulturfond 2016

Landsdel	Søknadssum	Tildelt sum	Prosent
Sørlandet	63 052 179	15 690 400	25 %
Østlandet	1 206 105 871	407 071 877	34 %
Vestlandet	479 636 162	116 423 770	24 %
Trøndelag	203 324 486	61 848 500	30 %
Nord-Noreg	176 547 008	49 399 466	28 %
Utlandet	22 237 629	2 226 000	10%
Totalt	2 150 903 335	652 660 013	30%

 

Tabell 3: Tal på søknader og tildelingar - Statens kunstnarstipend

Landsdel	Tal på stipendsøknader	Tildelte stipend	Prosent
Sørlandet	215	19	9 %
Austlandet	6040	618	10 %
Vestlandet	1367	133	10 %
Trøndelag	442	58	13 %
Nord-Norge	349	38	11 %
Utlandet	260	38	11 %