Ekstra aspirantstipend til Nord-Noreg

Kulturrådet har inngått ein samarbeidsavtale med Kulturnæringsstiftinga SpareBank 1 Nord-Norge om eit ekstra aspirantstipend for Nord-Noreg og Svalbard i 2013. Kulturnæringsstiftinga skal bidra til allmennyttig utvikling av kulturnæringa i Nordland, Troms, Finnmark og Svalbard.

Ny kompetanse og mangfald

Stipendet vil gå inn i den allereie eksisterande aspirantordninga til Kulturrådet, der målet er å styrkje rekruttering av utradisjonell kompetanse som kan fremje nye impulsar og stimulere til nytenking og utvikling i alle delar av kultursektoren. Ordninga skal sikre ei breiare sosial rekruttering til kunst- og kulturrelaterte yrke.

Glad for samarbeid

Samarbeidet kom i gang da Sparebankstiftinga kontakta Kulturrådet i etterkant av lanseringa av ordninga i september 2012, og dagleg leiar Bjørn Eirik Olsen, i Kulturnæringsstiftelsen er svært glad for å ha fått på plass et samarbeid.

- Kulturnæringsstiftinga har vurdert eit årleg stipend til ein eller to kulturnæringsaspirantar som eitt mogleg verkemiddel. Ettersom det vil vere for krevjande å opprette eit eige apparat for å velje ut berre ein eller to aspirantar i vår region, så er det nyttig for oss å samarbeide med Kulturrådet på dette området.. Dei kriteria som er annonsert for aspirantordninga til Kulturrådet er heilt samanfallande med dei kriteria vi ville valt sjølv, seier Olsen.

Også i Kulturrådet ser ein svært positivt på samarbeidet.

- Denne typen samarbeid er positivt for både oss og for kultursektoren. Jo fleire aspirantar, jo fleire framtidige kvalifiserte kandidatar til stillingar i kunst- og kulturinstitusjonane med variert kulturell og sosial bakgrunn, seier seniorrådgjevar Åshild Andrea Brekke i Kulturrådet.

Søknadsfrist 1. mars

Det einaste som skil det sjuande stipendet frå dei seks andre er at det er øyremerkt søkjarar frå Nordland, Troms, Finnmark og Svalbard. Resten av kriteria og søknadsfristen er den same som for dei andre seks stipenda.

Les utlysingsteksten og meir om støtteordninga.