Om søknadsrunden
Ordninga skal bidra til å styrke produksjon av publikasjonar som presenterer og/eller analyserer aktuelle problemstillingar innan samtidskunst og kunstteori. Det vert gitt støtte til fotobøker, bøker om teori, monografiar, artists’ books, utstillingskatalogar, manusutvikling, bok- eller magasinseriar, fanziner, ulike hybridbøker. Manusutvikling til lengre tekstar om samtidskunst er ein viktig del av ordninga.
Økonomisk oversikt
Kto. 2218 Kunstfaglege publikasjonar og manusutvikling
Til disposisjon: Kr 2 401 000
Tal frå søknadsrunden
Talet på søknader: 48
Søknadssum: Kr 6 238 996
Tildelingar (vedtak): 21
Vedtakssum Kr 1 400 000
Talet på søknader til denne ordninga held seg på eit jamt høgt nivå. Fagutvalet handsama 48 søknader og 21 ulike bokprosjekt vart tildelt støtte, to av desse er manusutviklings-prosjekt.
Søknadsbunken spenner vidt og i denne runden var det fleire godt utvikla og gjennomarbeidde prosjekt som vart vurdert. Det kan hende at pandemiens verknader og nedstenging av samfunnet kan forklare at talet på søknader om monografiar eller større bøker om teoretiske vinklingar på samtidskunsten held seg såpass høgt. - Tilbaketrekkinga til atelieret fører kanskje til større fokus, det vert tid til å gå gjennom og oppsummere kunstnarskap til bokprosjekt, sjølv om (separat)utstillingar har vore utsett eller avlyst.
Tendensar i søknadsmaterialet
Bøkene «0» om Lene Baadsvig Ørmen og «Untitled» om Frida Orupabo, den siste utgitt og lansert i samband med ein soloutstilling ved Kunsthall Trondheim, oppsummerer kortare periodar i eit kunstnarliv. Dei lengre monografiane er gjerne førd i pennen av fleire forfattarar, og presenterer deira blikk på ulike delar av kunstnarskapet. Dei har gått gjennom det visuelle «arkivet» til kunstnaren, samla og kontekstualisert materialet, delt inn i bolkar, gått i djupna. Gode fotografi av verka saman med utprøvande design og lay out av boka er med på å løfte fram kunstnarskapet. Her må bøkene om Inghild Karlsen og Thorbjørn Sørensen trekkjast fram.
Vidare er bokprosjekt om meir spissa teoretiske innfallsvinklar støtta, som UKS si jubileumsbok kalla «Kvisten på grenen, grenen på treet. Unge Kunstneres Samfund 1921-2021», som oppsummerer historikken til institusjonen, samt peikar på utfordringar framover. Boka «Avantgardens subjekt» vert utgitt av Harpefoss hotell kunstarena, er skreve av Erling Moestue Bugge og undersøkjer det norske kunstmiljøet frå 1968 og til i dag, med utgangspunkt i utstillingar og kunstverk frå perioden. Eit uval av Ina Blom sine tekstar dei siste 20 åra vert til antologien «Houses to Die in and Other Essays on Art» som vert utgitt på Sternberg Press med internasjonal distribusjon av MIT Press.
Fire fotobøker er tilgodesett i denne runden og det var sju søkjarar. Katinka Goldberg fekk støtte til den andre boka i fotobok-triologien «Bristningar», Ola Rindal tolkar omgjevnadene i Paris og Fåvang i Gudbrandsdalen under pandemien, Tønsberg arbeiderforening vert sett under lupa av Krisitin Linnea Backe, medan Signe Marie Andersen oppsøkjer sin eigen kunst i boka «Hjemme hos kunsten».
Utvalet valde å tilgodesjå fleire prosjekt innanfor kunsthandverk; Tina Jonsbus publikasjon «Vorma» fungerer både som dokumentasjon av eit kunstfagleg forskningsprosjekt langs elva Vorma, og er ei kunstnarbok med fysiognomiske kvalitetar. Fysiognomien kjem av koplinga mellom tematikkane og form på bok, tekst og visuelt materiale: trådar, fargar, elvelandskap, broderier. - Brita Been sin monografi kalla «Mønster overalt» dekkar eit langt kunstnarskap innan tekstil og kjem ut i samband med jubileumsutstillinga hennar ved Telemark kunstsenter i 2022. Lokal tekstiltradisjon, Nora Gulbrandsens porselen samt internasjonale påverknader dannar tekstgrunnlaget i publikasjonen og set Beens kunst inn i ein større samanheng. Spennande design av boka får godt fram det fargesprakande og presenterer på same tid breidden i produksjonen til kunstnaren.
Manusutviklingsstøtta skal stimulere til å skrive om samtidskunst i det visuelle kunstfeltet. Det var 8 søknader i denne runden og kun 2 vart tildelt støtte; m.a. skal Kjersti Solbakken skal skrive eit lengre katalogessay til LIAF 2024. «Det kollektive hodet» vil undersøkje kordan hugset, gjennom lagring, innhenting og tolking dannar det vi oppfattar som røynda og fiksjonen i ein kollektiv identitet.
Det var 10 kvinner og 5 menn som fekk støtte, i tillegg til 2 forlag og 4 institusjonar. Fylkesvis fordeling av tildelingane er 12 frå Oslo, 3 frå Viken, 2 frå Innlandet, 2 frå Trøndelag, 1 frå Vestland, 1 frå Vestfold og Telemark.
Prosess:
-
Søknadsfrist: 2.6.2021 kl. 13:00
-
Vedtak i faglig utvalg for billedkunst og kunsthåndverk: Dato ikke satt
Søk i tabellen
Søk i tabellen
| Søker | Prosjekttittel | Fylke | År | Søknadssum | Vedtaksdato | Vedtak | Tilskudd | Kategori |
|---|