Ordninga gjeld nye norske teikneseriar. Med «teikneserie» meiner ein her fysiske publikasjonar der teikningar eller andre visuelle element i sekvens formidlar ei historie eller anna innhald. Utgjevinga skal framstå som eit heilskapleg verk, og teikneseriesekvensar skal vere det bærande elementet.

Ordninga er regulert av retningsliner som søkjarane må setje seg inn i.

Norske utgjevarar kan søkje om innkjøp innan oppgjevne fristar same år som teikneserien blir gjeven ut. Dette inkluderer bøker omsett frå samisk og nasjonale minoritetsspråk til norsk, men det første originalverket kan ikkje vere meir enn fem år gammalt på søknadstidspunktet.

Som hovudregel kan ein serieskapar berre få ei bok for vaksne og ei bok for barn og unge innkjøpt på ordninga kvart kalenderår. Vurderingsutvalet kan gjere unntak frå hovudregelen i særlege tilfelle.

Påmelde titlar som innfrir dei formelle krava, blir behandla av Kulturrådets vurderingsutval for teikneseriar. Utvalet kan òg innhente faglege konsulentfråsegner, til dømes i samband med vurderinga av utgjevingar omsett frå samisk. Vurderingsutvalet består av tre medlemmer og eit varamedlem. Innkjøpsordninga for nye norske teikneseriar er ei selektiv ordning. Kor mange titlar som kan kjøpast inn, vert bestemt av det årlege budsjettet og dei vurderingane utvalget gjer når kvar enkelt tittel blir behandla.

I diskusjonane om kvalitet skal utvalet blant anna leggje vekt på om den påmeldte utgjevinga

• framstår som eit heilskapleg verk
• har tilstrekkelege kunstnariske og/eller språklege og handverksmessige kvalitetar
• har vore underlagt eit nødvendig redaksjonelt arbeid

Utvalet er delegert vedtaksmyndigheit frå Kulturrådet. Ved avslag blir det ikkje gjeve annan grunngjeving enn at boka ikkje er prioritert innanfor budsjettramma.

Sjå korleis søknaden blir behandla.

Slik behandles søknaden - Norsk kulturfond

Når ein søknad er behandla av vurderingsutvalet, vil forlaget få melding om boka blir kjøpt inn eller ikkje. Dersom ho blir kjøpt inn, skal boka så raskt som mogeleg, og seinast innan seks veker frå vedtaksdato, sendast til Kulturrådets distributør. Antal eksemplar som blir kjøpt inn, er avhengig av kva målgruppe boka henvender seg til. Innkjøpsbeløpet kjem an på målgruppa og og kva målform boka er skriven på.

Levering av bøker

Bøkene skal leverast til Biblioteksentralen, som sørger for å sende dei ut til norske bibliotek.

Leveringsadressa er:

Biblioteksentralen
OrbitArena
Industriveien 18
2069 Jessheim

Dersom vurderingsmaterialet til søknaden var digital trykkeklar fil, og ikkje ferdig bok, skal eit rapporteringseksemplar av den ferdigtrykte boka sendast direkte til kvart av dei fire medlemmene i vurderingsutvalet og til Kulturrådets sekretariat.

Betaling

Forlaget skal sende faktura til Kulturrådets sekretariat for kvar innkjøpte tittel. Bøker må vere leverte hos Biblioteksentralen før forlaget sender faktura, og forfallsdato skal vere 30 dagar.

I samsvar med økonomireglementet i staten utbetaler ikke Kulturrådet fakturaer til verksemder som har forfalne tilbakebetalingskrav. Faktura må sendast elektronisk i EHF-format. Elektronisk fakturaadresse er Norsk kulturfonds organisasjonsnummer 891 991 762. Elektronisk faktura er ikkje pdf-fil i epost eller link til fakturahotell. For meir informasjon om EHF-faktura, sjå kundesidene til DFØ.

Kulturrådet betaler eitt beløp direkte til forlaget for heile innkjøpet. Beløpet skal fordelast mellom forlag og serieskapar på bakgrunn av målgruppespesifikke betalingstabellar. Beløpa i betalingsmodellen vil vere avhengig av budsjetthandsaminga i Stortinget og kan bli justerte årleg.

Fakturaen må innehalde følgjande informasjon:

• referansenummer
• kva for ein innkjøpsordning boka er kjøpt inn under
• namn på forlag, forfattar og tittel
• målform (bokmål eller nynorsk)
• ISBN-nummer for trykt bok
• beløp

For titlar som er innkjøpte i 2024, skal desse betalingstabellane brukast

*Dersom serieskapar ikkje er ein person, skal beløpet fordelast etter same fordelingsnøkkel som vert nytta i kontrakten inngått mellom forlag og opphavspersonar.

Dersom serieskapar har bidrege økonomisk til bokproduksjonen og dermed redusert kostnadene til forlaget, skal serieskaparen sin andel av betalinga for eit innkjøp bli auka med same beløp. Forlagsandelen blir redusert tilsvarande.

Særskilde betalingsbestemmelsar

For nokre bøker kan vurderingsutvalet vedta å tilby utgjevaren eit lågare beløp for innkjøp enn det som er oppgjeve i betalingstabellane. Dette vil kunne skje for to kategoriar av bøker:

a) lite kostnadskrevjande utgjevingar og b) antologiar/samleutgjevingar.

a) For lite kostnadskrevjande publikasjonar, kan utgjevaren bli tilbode lågare betaling for eit innkjøp. Vurderingsutvalet vil i desse tilfella fastsetje ein innkjøpspris og ei fordeling mellom utgjevar og serieskapar(ar). Ei utgjeving kan falle i kategorien «lite kostnadskrevjande» dersom:

ho har eit totalt sidetal under 48 sider, og/eller

kostnadene for å trykkje opp det fastsette talet på eksemplar for innkjøp ligg vesentleg under kostnadene for standardutgjevingar.

Om ein publikasjon har eit totalt sidetal under 48 sider og/eller har ei utforming som gjer at han framstår som lite kostnadskrevjande å trykke, kan utgjevar legge ved dokumentasjon av produksjonskostnader, som eit grunnlag for utvalets vurdering av om punkt ii) er oppfylt.

b) For antologiar/samleutgjevingar kor meir enn 50 % av innhaldet har vore publisert tidlegare eller kor utgjevar ikkje har gjort avtale om honorar/royalty til serieskapar(ar), kan utgjevar bli tilbode lågare betaling for eit innkjøp. Vurderingsutvalet vil i desse tilfella fastsetje ein innkjøpspris og ei fordeling mellom utgjevar og serieskaper(ar).

Retningsliner for innkjøpsordning for nye norsk teikneseriar

Strategi for Kulturrådet

Kulturrådets områdeplan for litteratur

Habilitetsreglar for Kulturdirektoratet

Lovdata: Lov om Norsk kulturråd

Lovdata: Forskrift om tilskudd fra Norsk kulturfond