Museumsstatistikk for 2014
Tal på bygningar i norske museum 2014. Kulturhistoriske bygningar (4928), bygningar opne for publikum (2825), andre bygningar (772).
Vedlikehald av bygningar og anlegg i norske museum er ressurskrevjande. Utfordringane med bygningsforvalting aukar og mange museum greier ikkje å halde tritt med vedlikehaldsbehovet. Dette kjem fram i Statistikk for museum 2014 som Kulturrådet no gir ut.
Norske museum hadde 21,3 millionar gjenstandar og nærare 32 millionar fotografi i 2014. I tillegg forvaltar musea mellom anna bygningar, privatarkiv, teknisk-industrielle anlegg, kulturlandskap og hageanlegg.
Marie Skoie er fungerande leiar for museumsseksjonen i Kulturrådet.
- Utfordringane med å bevare, forske på og formidle samlingane har ført til auka medvit om prioriteringar, som i nokre tilfelle også endar med at musea avhendar objekt frå samlingane, seier Marie Skoie, fungerande leiar for museumsseksjonen i Kulturrådet.
I 2014 avhenda 25 museum til saman 24 406 gjenstandar, 602 fotografi, 2 farkostar og 21 kulturhistoriske bygningar. Likevel blir samlingane stadig større.
Museumsbesøk
Aldri har så mange betalt for å gå på norske museum som i 2014. 5,9 millionar betalande besøk vart registrert i fjor. Totalt var 10,9 millionar innom musea, ein liten nedgang frå året før, men likevel ein oppgang på nesten 25 prosent dei siste ti åra. 27 prosent av dei besøkjande i 2014 var barn og unge og nesten ein million av desse deltok i organisert undervisning.
Over dei siste fem åra er Troms fylket med størst prosentvis auke i besøk, med ein oppgang på 69 prosent, mens besøkstala gjekk mest ned i Østfold, med 26 prosent sidan 2010. Hedmark hadde den største auken siste året med 27 prosent.
Sett i forhold til andre europeiske land, er Noreg mellom dei fem landa med flest museumsbesøk per innbyggjar.
Digitalisering
Stadig fleire museum legg ut samlingane sine på nett. Besøket på www.digitaltmuseum.no, ein felles publiseringskanal for musea, tyder på at publikum set pris på å få digital tilgang til samlingane. Besøket på nettstaden steig med 20 prosent frå 2013. Til saman 1,56 millionar besøk vart registrerte i fjor, det tilsvarar ei dobling i løpet av to år.
Musea legg ned eit stort arbeid i å registrere og digitalisere samlingane. Digitalisering er eit viktig ledd i å forvalte og gjere samlingane tilgjengelege. I 2014 har spørsmål om registrering og digitalisering blitt endra noko for å stemme betre med praksisen i musea. Særskilt har nokre av universitetsmusea satsa på å digitalisere og gjere arkeologisk og naturhistorisk materiale tilgjengeleg, men også tala for dei kulturhistoriske og kunsthistoriske gjenstandskategoriane blir stadig betre. Etterslepet i registrering og digitalisering er størst for dei store fotosamlingane.
Lenker
Museumsstatistikken for 2014 er delt i to ulike publikasjonar.
- Museumsstatistikk for 2014. Denne innheld analyse og grafar.
- Vedlegg. Statistikk for museum 2014. Denne innheld tabellar. Tala er også tilgjengelege i eit rekneark (excel) (open document).