Kulturrådet på pansamisk kunstnarkonferanse

- Det var interessant og lærerikt å delta på konferansen og få innblikk i vern og vidareføring av samisk immateriell kulturarv i Sápmi, seier Hildegunn Bjørgen i Kulturrådet. 

Sametinga i Finland, Sverige og Noreg arrangerte konferansen i samarbeid med utvalde kunstnarorganisasjonar. Sametingspresidentane i Noreg og Finland, samt ein sametingspolitikar frå Sverige, opna konferansen.

Målet med arrangementet var å lyfte fram immateriell kulturarv i heile Sápmi og diskutere utfordringar i arbeidet med å verne og vidareføre  tradisjonell kunnskap og levande tradisjonar i regionen. Konferansen tok også mål av seg å identifisera felles utfordringar og i samarbeid byggje et grunnlag for å verne og vidareføre denne delen av kulturarven.

Det er fyste gong det har gjennomført ein konferanse om temaet immateriell kulturarv der samar frå både Noreg, Sverige, Finland og Russland heldt innlegg om samisk kunst og kultur. Nokre peikte på utfordringar i arbeidet med joik, munnlege forteljingar og duodji som næring, mens andre trekte fram utfordringar rundt tradisjonell næring og naturressursar. Fleire forskarar, utøvarar og folk frå museum- og arkivsektoren tok i sine presentasjonar opp etiske problemstillingar knytt til vidareføring av immateriell kulturarv og peikte på behovet for felles etiske retningslinjer, og fleire etterlyste tettare samarbeid kring slike problemstillingar i regionen.

- Dei samiske utøvarane og utøvarorganisasjonane sit med viktig kunnskap som vi treng i arbeidet med vern og vidareføring av samisk immateriell kulturarv. Kulturrådet ynskjer å bidra til at dei levande tradisjonane og den tradisjonelle kunnskapen vert ført vidare, seier Bjørgen.

Rasul Samadov frå UNESCOs sekretariat i Paris deltok på konferansen og framheva at vern og vidareføring av immateriell kulturarv betyr mykje for enkeltmenneske over heile verda. Han gjorde greie for UNESCO sitt arbeid på området, og viste til virkemidlane dei har i sitt arbeid. Samadov informerte om at UNESCO nettopp har vedtatt ein strategi for arbeid med urfolks immaterielle kulturarv. Han presiserte at UNESCO gjerne vil støtte urfolks arbeid og inviterte til vidare samarbeid fordi sekretariatet også treng innspel og kunnskap frå dei som kjenner kor skoen trykker.

Finland var representert med folk frå Kulturdepartementet og Museiverket. Leena Marsio frå Museiverket fortalte om deira arbeid med implementeringen av konvensjonen i Finland og understreka at konvensjonen kan bli brukt i arbeidet med å løfte samisk immateriell kulturarv. Sverige på si side peikte på det er viktig med samarbeid i heile regionen for å løfte dette arbeidet.

Bjørgen frå Kulturrådet understreka at urfolks immaterielle kulturarv i fleire år har vore prioritert i arbeidet med implementeringa av konvensjonen, og ho viste til eit tett og godt samarbeid med Sametinget i Norge. Kulturrådet ønskjer å vidareføre dette arbeidet – og vere ein støttespelar for samiske utøvarar og utøvarorganisasjonar i arbeidet med å vidareføre immateriell kulturarv.

Sjå klipp frå konferansen og les meir her