– Stortinget viser eit høgt ambisjonsnivå for den rolla kulturen skal ha i samfunnet

Stortingsmeldinga Kulturens kraft vart presentert av regjeringa seint i 2018, og i dag vart meldinga endeleg debattert av eit samla storting.

Kristin Danielsen er glad for at Stortinget så tydeleg slutta opp om hovudbodskapen til stortingsmeldinga: at kunst og kultur har ein samfunnsbyggande kraft, og at eit rikt og variert kulturliv er ein føresetnad for ytringsfridom og eit velfungerende demokrati.

– Stortinget viser eit sterkt engasjement og eit høgt ambisjonsnivå for den rolla kunsten og kulturen skal ha i samfunnet. Det er nødvendig i ei tid kor viktige verdiar vi tar for gitt i Noreg, som ytringsfridom, tillit og fellesskap, møter motbør, seier Danielsen.

Ni overordna mål

Stortinget slutta seg òg til dei ni overordna måla til kulturmeldinga, nemleg eit fritt og uavhengig kulturliv som:

• skaper kunst- og kulturuttrykk av ypparste kvalitet
• fremjar danning og kritisk refleksjon
• tek vare på og formidlar kulturarv
• skaper og formidlar eit kulturtilbod som blir opplevd som relevant, og som representerer befolkninga
• er tilgjengeleg for alle og oppmuntrar den enkelte til å oppleve og delta i kulturaktivitetar
• tilbyr møteplassar og byggjer fellesskap
• fornyar seg og viser evne til omstilling
• har internasjonal gjennomslagskraft og fremjar interkulturell forståing
• styrkjer norsk språk, dei samiske språka, dei nasjonale minoritetsspråka og norsk teiknspråk som grunnleggjande kulturberarar

– Kulturrådet sitt arbeidsfelt omfattar alle desse ni måla, og vi ser på debatten i Stortinget som ein marsjordre for å bli endå betre i arbeidet vårt, seier Danielsen.

Stadfestar Kulturrådet som nasjonalt fagmiljø

Eit stort fleirtal gjorde det òg klart at det ikkje er aktuelt å flytte fleire oppgåver frå Kulturrådet og ut til dei nye regionane. Frå før er museumsseksjonen i Kulturrådet flytta til Bodø, og seksjonen for kreative næringar etablert i Trondheim.

– Dette er ein gledeleg stadfesting av Kulturrådet som nasjonalt fagmiljø, seier Danielsen.

– Samtidig er vi stolte over kontora vi har etablert i Trondheim og Bodø, som sikrar at Kulturrådet er tydeleg til stades i fleire landsdelar.

Dagens stortingsdebatt er berre den første av mange kulturpolitiske diskusjonar som vil prege norsk politikk i tida framover. I kulturmeldinga blir det varsla ei rekke stortingsmeldingar om kulturfeltet dei neste åra.

– Vi ser fram til å delta i dei mange kulturdebattane som kjem, og til å vere med i utforminga av kulturpolitikken framover, seier Danielsen