42 millionar til kunst og kultur
Grusomhetens teater fekk 1,8 millionar kroner i støtte frå ordninga Rom for kunst. Foto: Vistnorway.com
Det blei delt ut 42 millionar kroner til kunst og kulturformål frå Kulturfondet i rådsmøtet 26. september.
Kulturrådet var samla til sitt fjerde rådsmøte 26. september. Til søknadsfristen 1. juni hadde det kome inn 1456 søknader om til saman 220 millionar kroner. 482 av desse søknadane fekk tilskot på i overkant av 42 millionar kroner. I tillegg delte rådet ut æresprisen og behandla ei rekkje andre saker, mellom anna blei det vedteke ei ny støtteordning for forprosjekt på scenekunstfeltet.
Det blei i denne runden gjeve tilskot til fagområda Musikk, Kulturvern, Litteratur, Scenekunst, Biletkunst og kunsthandverk, Barn og unge, Kunstløftet, Rom for kunst og Andre formål.
Musikk
Mange musikkordningar hadde søknadsfrist denne gongen, og det blei delt ut 16,7 millionar kroner til 261 tiltak innanfor ordningane arrangørar, musikarar, kyrkjemusikk, innspelingar, publisering, likestilling og produksjon.
Det blei gjeve 11 tilskot til musikkproduksjon. Bergen Contemporary Art Project AS mottok 300 000 for å setje opp Playing the building av David Byrne. Playing the Building er ein lydinstallasjon der bygningen blir eit stort musikkinstrument. Du kan lese meir om prosjektet på David Byrnes nettsider.
Det blei også løyvd 125 000 til å digitalisere, tagge og tilgjengeleggjere tekstar, bilete og platecover frå Norsk pop- og rockleksikon.
47 søkjarar fekk 90 000 kvar i publiseringsstøtte. Totalt var det 109 søkjarar til denne ordninga.
Vidare fekk 51 søkjarar støtte frå arrangørordninga. Blant desse finn vi Sandnes rockeklubb, Hjørnet Live på Nesbyen og Lofoten jazzklubb.
Sjå alle musikktildelingane:
Musikkproduksjon og andre musikktiltak
Likestillingstiltak på musikkfeltet
Litteratur
Fagleg utval for litteratur behandla 99 søknader og ga tilskot til 67 av desse. Ei av dei viktigaste sakene i dette utvalsmøtet var å vedta kva tidsskrift som skulle omfattast av innkjøpsordninga for tidsskrift i 2014. Til saman 15 tidsskrift kom inn på ordninga for 2014, av desse to nye, litteraturtidsskriftet Vagant og filmtidsskriftet Z.
To litteraturfestivalar fekk støtte. Spark! Tromsø poesifestival fekk 80 000 kroner og Ord i spor 2014-2017 i Narvik fekk 50 000.
Sjå alle tildelingane frå litteratur
Innkjøpsordning for allmenne kulturtidsskrift
Prosjektstøtte litteratur (andre litteraturtiltak, mosaikk, barne- og ungdomslitteratur)
Forsking og utvikling
Forskings- og utviklingsutvalet løyvde 100 000 til vidare utvikling av ei ny forskingssatsing om kunst, kultur og kvalitet. Målet med satsinga er å bidra til å styrke kunnskapsgrunnlaget knytt til kvalitetsvurderingar og kvalitetsforståing i kultursektoren.
Biletkunst og kunsthandverk
Fagleg utval for biletkunst og kunsthandverk fekk inn 255 søknader til behandling. 39 av desse fekk støtte på til saman meir enn fem millionar kroner.
Tromsø kunstforeining fekk 300 000 til utstillinga «Sannhet og skjønnhet - dialoger mellom samisk kunst og forsking», Rake visningsrom i Trondheim 250 000 og Bergen kjøtt 100 000 til Life is the only way - utstilling ved Bontelabo hausten 2013.
Prosjektstøtte (utstillingar, publikasjonar, diverse tiltak, kunstfestivalar, Institusjonar)
Utstillingsstøtte til kunstnarar i etableringsfasen
Kulturvern
Avsetjinga for kulturvern er delt i to, prosjekt og litteratur. Til saman fekk utvalet inn 70 søknader og ga støtte til 26 av desse. Arbeiderbevegelsens arkiv og bibliotek fekk 150 000 i støtte for å rekonstruere og tilgjengeleggjere DNA og NKPs tapte mellomkrigsarkiv. Arkiva gjekk tapt under krigen, men kan rekonstruerast frå kopiar i det russiske statsarkivet for sosial og politisk historie.
Rom for kunst
Utvalet for Rom for kunst delte ut over fem millionar kroner til 15 søkjarar. Eit av dei største tilskota gjekk til Grusomhetens teater i Oslo med 1,8 millionar kroner. Tilskotet skal brukast til oppbygging av lokale og scene etter skader og slitasje. Lokala blir brukte både av teaterkompaniet sjølv og til utleige til andre profesjonelle scenekunstgrupper og er ein viktig scene i den samla infrastrukturen for scenekunst i Oslo.
I tillegg blei det blei gjeve støtte til dei tre kunsthallane i Stavanger, Trondheim og Porsgrunn.
Sjå alle tildelingane til Rom for kunst
Barne og ungdomskultur
Fagleg utval for barne- og ungdomskultur fekk inn 112 søknader til denne søknadsfristen. Utvalet behandlar to støtteordningar, Prosjektstøtte for barne- og ungdomskultur og Kunstløftet.
Kunstløftet fekk inn 20 søknader og ga tilskot til ti av desse. Det største tilskotet, ein million kroner, gjekk til det eigeninitierte tiltaket «Ung respons – i møte med kunst og kultur». Ulike prosjekt kan søkje om støtte frå dette tiltaket. Målsetjinga er å gje midlar til prosjekt der unge, også i samarbeid med profesjonelle vaksne, tek initiativ til ny aktivitet eller kritiserer ulike kunst og kulturuttrykk. Midlane blir utlyst i 2014, meir informasjon vil kome på kulturradet.no
Prosjektstøtte barne- og ungdomskultur
Andre formål
Posten Andre formål er Norsk kulturråds avsetning for tiltak som fell utanfor eller går på tvers av dei etablerte fagområda biletkunst, litteratur, musikk, scenekunst og kulturvern. I stor grad dreier dette seg om tverrfaglege prosjekt, festivalar og kulturarrangement. Det blei gjeve støtte til ti prosjekt frå denne posten.
Av dei som fekk støtte var Bollywoodfestivalen med 225 000 til danse- og musikkdelen av festivalen, Medieoperatørene med 125 000 til ein dokumentarfilm om Martin Slaatto og Mårenbiennalen i Sogn og Fjordane med 95 000.
Sjå alle tildelingane frå Andre formål
Scenekunst
Det er to utval som behandlar søknader på scenekunstfeltet. Til saman hadde det kome inn 130 søknader på 38 millionar kroner. 27 søknader blei støtta med tre millionar.
Fagleg utval for dans behandla søknader om koreografiutvikling. Til denne avsetjinga hadde det kome inn 34 søknader med ein samla søknadssum på 1,8 mill kr. Ni søknader fekk støtte på til saman 330 00 kroner. Fem av ni prosjekt var Oslobaserte, mens dei andre var frå Nord-Trøndelag, Buskerud, Rogaland og Finnmark. Eitt av prosjekta var retta mot barn.
Fagleg utval for scenekunst behandla søknader til tre avsetjingar, gjestespel/formidling, scenetekstutvikling og andre scenekunsttiltak i utvalsmøtet denne gongen. Åtte søkjarar fekk støtte til scenetekstutvikling, mellom anna Hans Petter Blad og Thomas Bye.
På avsetjinga gjestespel/formidling blei det løyvd 200 000 kroner til Ny Musikk Bergen for den eksperimentelle operaforestillinga Lohengrin. Eit anna prosjekt som også er løyvd 200 000 i gjestespelstøtte i denne runden er Mia Habibs danseforestilling med robotar og ein dansar, Why should you gaze at Shulammite as on the dance of armies?